مابين صمت وحزن طالت مشاويري

والصبر عقب الجفا قصرت مشاويره

انا بشر اخطي مثلي مثل غيري

لكن قلبي وطن ماهو مثل غيره

انت ابخص الناس في فهمي وتفسيري

واليوم قدني غريب وصعب تفسيره

وشرايك انك سبب في صدي وتقصيري

ومثلك يسوق العذر لا بان تقصيره

لولاي طود شمخ جاتك معاذيري

وشرواي لا ما اعتذر تقبل معاذيره

قدام نفسي وش اعذاري وتبريري

هزل المعاذير عندي صعب تبريره

ماودي افكرك ارهقت تفكيري

مثلك حسافه تفكاره وتفكيره

وقت الهدد تذكره اهديت لك طيري

وش خانت الرجل لامنه غدا طيره

على كثر مارقبتك في مداويري

يقول قلبي ترى كثروا مداويره

اقفيت واقبل معك شعري وتعبيري

ولك اول رساله من تعابيره

ابقطع الشك واقرر وتقريري

يصعب على المبتلي شرواي تقريره

فمان ربي مع شكري وتقديري

من صاحب عزك وضيعت تقديره

روح لابول ولا بتلى مخاسيري

واتلى العهد من ربحك اول مخاسيره