قصيدة رجالهم يتعب لكسب الجماله

كلمات قصيدة رجالهم يتعب لكسب الجماله ، قصيدة مدح شمر همزان ، الشاعر ابراهيم الرديعان

قصيدة رجالهم يتعب لكسب الجماله

الشاعر ابراهيم الرديعان

 

مظهور جيت الشاذلية لحاله

و اخذت منها قدر خمسة فناجيل

 

و نعمٍ بمظهور ابو فايز عبا له

الزعفران و عودٍ اشقر مع الهيل

 

و له طبخةٍ يجعل بهاره عداله

و من دونها ما صك بابه بتقفيل

 

و قدوع من تمر الشبيكة حلا له

تمره على تمر الجبل به تنافيل

 

ديرة جدوده يوم عصر الجهاله

حامينها بسيوفهم و المفاتيل

 

عن كل طماعٍ يحاول يناله

أصعب من الكعبة على راعي الفيل

 

و بيوتهم يلقى الذراء من عنى له

سلومٍ لشمّر كاسبين التنافيل

 

و جذيل بن عيسى هذولا عياله

و اللي جهل يلقى التواريخ لجذيل

 

همزان ما نختص واحد لحاله

متوارثين الطيب جيل بعد جيل

 

رجاّلهم يتعب لكسب الجماله

قولي صحيح و يشهدون الرجاجيل

 

و حقٍ على رد الثناء و الجزاله

كلمة وفاء ما هي كذوب و تهاويل

 

و صلوا على محمد ختام الرساله

ختامها أطيب صلاةٍ و تهليل

قد يعجبك ايضا