قصيدة الهنوف مكتوبة ، كلمات الهنوف اللي فرحها سافرت به عن بلدها كلمات القصيدة ، كلمات الشاعر : زايد الرويس

كلمات قصيدة الهنوف

الهنوف اللي فرحها سافرت به عن بلدها
خلت الفرقا تسولف عن حبيب بلا حبيبة

ما ورا حزني عليها غير شيٍ من كمدها
ولا ستر فستانها الأبيض سوى حزنٍ يجيبه

وانت يا اللي من فرحك تضم يدك بوسط يدها
أشهد انك خذت مني وانت ما تدري ذهيبة

لو به انثى في حلاها مابه انثى في رغدها
ما يشابهها بعيد ولا تحاليها قريبة

حسنها في حزنها شف كيف صار آمرّ وادهى
عاد لو من قلبها تضحك تشوف اكبر مصيبة

رح بها مادام ربي ساق لك لين جسدها
وانتبه تكفى على اغصانٍ من الرقة رطيبة

إن بغيت تمر مر بملحها والا شهدها
ومن دفاها لا تقول القلب محرقني لهيبه

إن حسدتك ما حسدتك غير في زمة نهدها
وان طلبتك ما طلبتك غير من زود الغليبة

اسألك بالله تكفى لا تقصّر عن سعدها
قد ما تقدر تهنيها بلحظاتٍ عصيبة

وحاول انك قد ما تقدر تنسيها نكدها
دام كلٍ في حياته ما يجيه الا نصيبة

خذ معك نبضٍ يعيش بها وهو داخل بلدها
واعرف اني من بعدها صرت اعيش بلا حبيبة

قصيدة الهنوف للشاعر زايد الرويس